Резултати од истражувањето за потребите на корисниците на поштенските услуги

Агенцијата за пошти како независно регулаторно тело од областа на поштенските услуги, во рамки на активностите за следење и анализа на пазарот и оваа година спроведе преку независна компанија Истражување за потребите на корисниците на поштенските услуги.

Основен предмет и цел на истражувањето беше проценка на потребите на корисниците на поштенските услуги. Истражувањето даде одговор и проценка колку обезбедувањето на поштенските услуги од страна на давателот на универзалната услуга „АД Пошта на Северна Македонија„ – Скопје ги задоволува потребите на корисниците.

Истражувањето е реализирано со квантитативна истражувачка методологија,  односно користени беа истражувачките техники: интервјуа лице-в-лице, телефонски интервјуа и  веб-засновани/онлајн интервјуа. Истражувањето опфати физички корисници од урбани, рурални и тешко достапни  населени  места, како и правни лица од мали, средни и големи претпријатија. Истражувањето беше спроведено во сооднос 70 : 30 во корист на бизнис корисниците, а вкупно 600 лица (физички и правни) беа испитани.

Репрезентативноста на физичките корисници е обезбедена според најновите податоци за проценка на населението по региони и место на живеење од 2015 година според Државниот завод за статистика. 

Клучни поенти: Физички лица

Резултатите од истражувањето покажуваат дека најкористени поштенски услуги се финансиските трансакции 64%, па следува подигање на пакет 53% и подигање препорачани пратки 48%. Локацијата на поштенската единица е основна причина за посета на избраната поштенска единица и истата е пoсетена од 52% од испитаниците еднаш месечно.

Дури 64% од корисниците се изјасниле дека немаат предлог како да се подобрат условите за пристап до поштенските услуги.

Главните причини за незадоволство од поштенските услуги се застарени процедури 58% и цените на поштенските услуги 58%.Незадоволството е воедно и заради проблемите со достава (нередовни, несоодветни) искажано со 42%.

58% од испитаниците се изјасниле дека немаат поштенско сандаче, додека 46% се донекаде задоволни од поставеноста на поштенската единица до нивниот дом.

66 % од испитаниците сметаат дека е добро и корисно давателот на универзалната услуга да  ги обезбедува своите услуги не само во нивните деловни простории преку нивниот персонал, туку и преку договорни пошти (приватни продавници, продажни места, трговија, бензински пумпи).

64% од испитаниците воопшто не испраќаат писма на месечна основа, 3% испраќаат повеќе од 5 писма, додека 62% не испраќаат пакети, а 46% примаат до 2 пакета годишно на свое име.

Во однос на типот на писмата 49% од испитаниците изјавиле дека тоа се само сметки.

52% од испитаниците користат електронска наплата на сметки.

41% од корисниците се изјасниле дека не го намалиле користењето на поштенските услуги заради електронската пошта, додека 57 % од испитаниците се изјасниле  дека заради електронската пошта помалку користат поштенски услуги.

На прашањето поврзано со цената на писмото кое изнесува од 25 денари 51% од испитаниците се многу или донекаде задоволни, 32% ниту се задоволни ниту се незадоволни.

Во однос на доставата 53% од испитаниците сметаат дека е доволно доставата да биде 3 пати во неделата или секој втор работен ден, а 47% сметаат дека достават треба да биде 5 дена во неделата.

Што се однесува за прашањето за деновите  51% од корисниците сметаат дека е во ред доставата на поштенските пратки на домашна адреса во сабота да се врши што е и оправдано сметајќи дека луѓето се дома во споредба со работните денови.

Брзината на доставата на поштенските пратки е основата за дефинирање на квалитетот на обезбедување на поштенските услуги и за оваа прашање се изјасниле исто дури 83% од испитаниците, следи: локацијата на поштенските единици 64% и 54% цена за поштенската услуга.

70% од испитаниците не се запознаени со постапката за поднесување на рекламации кај давателот на поштенски услуги за изгубени, оштетени поштенски пратки и  пречекорување на рокот за достава, итн. а само една третина 30% изјавиле дека се запознаени со оваа постапка.

Две третини до испитаниците се изјасниле дека користеле услуги на друг давател на поштенски услуги и тоа 73% се изјасниле дека користеле услуги на Карго Експрес ДООЕЛ увоз извоз Битола, па 29 % услуги на ДХЛ Експрес Македонија ДООЕЛ Скопје.

26% од испитаниците нарачуваат пратки преку интернет и примаат до 5 пратки годишно во внатрешен поштенски сообраќај, а преку социјалните мрежи 44% нарачуваат до 2 пратки во месецот за кои 61% плаќаат во готово при прием на пратката.

Во однос на важноста на поштенските услуги за време на пандемија 68% од испитаниците се согласуваат дека поштенските услуги се важна гранка во услови на пандемија, од причина што поштенските услуги се едни од единствените начини на комуникација каде е ограничено движењето.

Клучни поенти: Правни лица

60% од испитаниците -деловни корисници најчесто користат услуги на прием  и подигање на писма, сметки, на домашна адреса, 62% за подигање на препорачана пратка, пратка со означена вредност или пакет при посета на поштенска единица.

Испитаниците ја избираат одредената поштенска единица заради локацијата на истата и 30% еднаш месечно ја посетуваат поштенската единица.

Генерално деловните корисници се задоволни од поштенските услуги, бидејќи 41% изјавиле дека се донекаде, а 23% дека се многу задоволни. 26% се неутрални, додека 8% се донекаде незадоволни, а 2% многу незадоволни.

Како основни причини за своето незадоволство ги наведуваат проблемите со доставата дури 83%, како и застарените процедури 61%. 

Околу 70% од испитаните деловни корисници се изјасниле дека се многу задоволни односно до некаде задоволни со зачестеноста на доставата на поштенските пратки и од нив 67% се согласни поштенските пратки да се доставуваат и преку договорни пошти.

35% од испитаниците испраќаат повеќе од 5 писма месечно, а 27% примаат 20 и повеќе писма на име на компанијата.

Испраќање на пакети како  услуга 60 % од испитаниците не ја користат, а 29% од испитаниците примаат 20 и повеќе пакети на име на компанијата.

39% од пратките што ги добива една компанија се сметки, но заради електронската пошта 68% помалку користат поштенски услуги.

Цената ги задоволува потребите на корисниците од приближно 50% испитаници се изјасниле така и во однос на подготвеноста да платат повисока цена за зголемен квалитет на поштенските услуги 33% од деловните корисници се подготвени да платат повеќе.

54% од деловните корисници сметаат дека поштенските пратки треба да се доставуваат нареден работен ден (Д+1), 57% се изјасниле дека е доволно три пати да има достава во текот на неделата.

84% од деловните корисници се изјасниле дека брзината на пренос на поштенските пратки е основен фактор во однос на дефинирање на квалитетна достава на поштенски услуги.

64% од испитаните деловни корисници изјавуваат дека заради електронската пошта користат помалку поштенски услуги, додека 32% не се согласуваат со овој став.

43 % од деловните испитаници изјавиле дека се запознаени со постапката за поднесување на рекламации кај давателот на поштенски услуги за изгубени, оштетени поштенски пратки и  пречекорување на рокот за достава, итн.и 56% од корисниците немаат поднесено рекламација по одредена поштенска услуга.

Три четвртини односно 72% од деловните корисници користеле поштенски услуги од друг давател на поштенски услуги и тоа 86% се изјасниле дека користеле услуги на Карго Експрес ДООЕЛ увоз извоз Битола, па 36 % услуги на Брза пратка ДООЕЛ Скопје, 28% услуги на ДХЛ Експрес Македонија ДООЕЛ Скопје.

Основна причина од корисниците и на други даватели на поштенски услуги, за користењето на другите компании е нивната брзина на достава 72% и брзината на приемот 68%.

31% од деловните испитаници изјавиле дека не нарачуваат преку интернет, ниту преку социјални мрежи, а подеднаков процент од околу 35% услугите ги плаќаат во готово при самиот прием на пратката или електронски со платежна картичка при самото нарачување на пратката.

Висок процент од 80% деловните корисници се изјасниле дека користат електронска наплата на сметки.

 

ИСТРАЖУВАЊЕ НА ПАЗАРОТ 2021 година